Praktikatu eta Bizi

Aurten ere Bilboko AEK gugana etorri da Praktikatu eta Bizi programaren matrikulatze kanpainan argitaratuko duen bideo sorta eskatzeko. Biziki pozten gaitu urte batetik bestera errepikatzen duten bezeroak izateak!

Proiektua, beraiek eskeintzen duten programa nola egituratzen den ikusita, 4 bideo laburretan banatzea erabaki genuen. Helburua jendea erakartzea da, euskaraz praktikatzeko AEK-k hiritarren esku jartzen dituen ekimen desberdinetan apuntatu dadin.

Horretarako, oraingoan ezinbestekoa iruditu zitzaigun indar guztia irudian jartzea, emaitza garbia, erakargarria eta egunekoa lortzeko. Lokalizazioen aukeraketak berebiziko garrantzia izan zuen prosezu honetan. Bestalde, kontu haundia izan genuen atrezzo eta jantzien aukeraketan, argazkiaren osotasuna erabakitako kolore eta tonoekin bat izan zedin.

Lau bideoen grabaketarako Berde Produkzioak ekoiztetxeko lantaldea aukeratu genuen. Larraitz Zuazo izan zen errealizazio eta muntaiaren arduraduna eta Elena Galdiz ekoizpen eta artistikarena.